Am Mittwuche, 9. Mai hi wir z 14ta Trainingslager im Klettgau i Agrüff gno. Am spätere Namittag si nadisna d’ Teilnähmer ufum Bärghof iitroffe, di einte mitum Outo u di ganz fruckte si grad mitum Völo aagreist. D’Chuchi-Crew isch scho flissig am iirichte gsi u wir hi z’Huus beschlagnahmt u d’Zümmer bezoge wo de Präsi für üs aagschrübe het. Ds Begrüessigsbriefli mitum guete Tropfe u de Bettmümpfeli hi üs sehr gfröit. D’Bike-Guides Hans u Kudi hi no di lötschte Rekognoszierige für d’Biketoure vorgno u Simon het z’erscht Louftraining dür d’Räbbärge gleitet. Nachum Apéro i de warmi Stuba hettes scho feins us de Chuchi gä.

Am Donschtig het Petrus Rään profezeit, u rächt becho. So hi wir ds Donschtigsprogramm mitum Fritigprogramm g’wächselt u si richtig Löhnige id Turnhalle. O hie hi as paar Lüt di 10km uf Löhnige under d’Turnschlappe gno. I de Halla het de Sam gugget, dassmer ali schö warm sy u de isch de flissig Unihockey u Volleyball gspöut cho, Merci Sam fürs organisiere. De Namittag het jeda säuber chöne verplane. Wir hi üs de ommi zum z’Nacht troffe. Hüt am Abe isch d’Uusloosig für d’Staffette ufum Programm gstane. Sam u Urs hi di Näme flott underenand g’mischlet u di vier Girls hi di Gruppe zäme glooset. So isch de Team-Geischt füre räscht vor Wucha lanciert gsi.

Am Fritig Morge het d’Suna ommi dür d’Feischter ii glächlet – genau aso hi wir’s doch gäär. So si wir mit üsne Bike-Guides Hans u Kudi topmotiviert mit flotte Toure ufum GPs am haubi zächni ufum Bärghof gstartet. Zum Startschuss hets no grad as Gruppefoto vo allne Hallau 2018-Teilnämer gä. De Kudi het d’Familietour übere Strickerhof, Schleitheim, Stühlinge uf Egginge zum Mittagsrascht id Badi gfüert, wo no as Fuessbad dringlääge isch. De isches witer richtig Wutöschinge iz versprochena Gelati u de obsi zum Voguhof u de schön d’Höchi bhaute bis zum Bärghof. Hans isch o gäge Strickerhof gstartet u isch de über Begginge mit sir Gruppe zur Säuschwänzlebahn gfahre, u de zrugg über Egginge, Mühle Wunderklinge zrugg ufe Bärghof. Härzlicha Dank a Kudi u Hans für ds organisiere vo däne schöne Biketoure. Am füüfi isch de scho de Psuech u d’Wyy-Deguschtation i de Trotte z’Löhnige ufum Programm gstane, u aschliessend isch o grad ir Trotte z’fein Nachtässe serviert cho. Nid z’vergässe di wääääuts Cremeschnitte offeriert vor Trotte. DANKE vöu mau.

Am Samschtig isch scho büm z’Morge d’Närvosität i de Gsichter gstane, wäge de *Plousch*- Staffette. Da isch di Yoga-Lektion mit de Daniela grad glääge cho, bü Sunneschyn hi sich d’LSV’ler vo de Daniela la id Yoga Wäut mitnää. DANKE Daniela. U iz ja nid no z’vöu mache… süsch mani de ade Staffette nümme isch z’Motto gsi, u so isch für di einte as liechts Footing ufum Programm gsi, u di andere si no chli ga di schöni Gägend mitum Bike erkunde. Pünktlich uf di drü si d’Gümmeler z Oberhallau zur Staffette gstartet. Gspannt hi d’Churzläuferinne u Läufer büm Bärghof passet u g’wärwiiset, wöla Gümmeler as us erscht um d’Kurva chunt. Baud si au Churzläufer uf de Strecki gsi u d’Biker si närvös cho u flissig ga iifahre. D’Churzbiker hi de z’Klassement ommi chli dürenand pracht u d’Läufer wo 2 Rundene hi müesse mache, hi no chli witer mischlet. So hets de Zuefall wöle, dass di disjährigi Staffette a Spannig chum z’überbiete gsi isch u mitama Fotofinisch ufum Bike z’End gange isch – vo Plousch hetmu da nümme vöu gmerkt :-).

D’Staffette isch no i de Chnoche gsi, wo üsa Präsi het afa Lottozahle aailääse. Mit süesse u schmeckige Priise si d’Gwinner beglückt cho, u baud si Alder’s dezuegstosse u ds Apéro isch serviert cho. Ds Wätter hets so guet gmint, dass wir di feine Filet’s uf de Terrasse hi chöne ässe. As riesigs Merci ad Silvia u Pedro für di super feini Chuchi wo wir o dises Jahr ommi hi dörfe gniesse.
Am Sunntig isch vorum traditionelle Brunch no Louftraining u Bike aagseit gsi u a de Uufbruchstümmig isch nid schwer z’erkenne gsi, dass Hallau 2018 baud Gschicht isch. Iz no de Hallau-Iitrag im Gäschtebuech z’vergää gsi – MERCI Monika für dini spontani Zuesag. Pünktlich ufe Mittag hi wir die gröbschte Spuure verwüscht, u d’Outo glaade ghäbe u si ommi gäge hiimzue.
A grosses Merci a ali 2018 Hallauer – as het inisch meh gfägt.
Sonia

So…. u iz z’ganza no chli farbiger:  [nggallery ID=37]