Am Sunntig Abe het Fritz beschlosse, ds Oschtermentig Bike o mit zwifuhafter Wättervorhärsag dürzfüere. Am Mentig Morge si nümme ganz ali begeischteret gsi vo där Entscheidig u hi zur Sicherhit no is iz Internet gugge, ob würklich ? ja würklich!! So simmer na dis na bü Silvia u Fritz iitrudlet u zum erstuune vo de Gaschtgäber ganzi 14 Teilnämer gsi. Pünktlich simer am haubi zächni bü trochenum Wätter u aagnähme Temperature losbiket richtig Schorewaud. Scho im erschte Uufstig hetes im Präsi sim Bike d Chetti iiklemmt. As het de a gröberei Üebig gä u Edi, Hans u Roger hi z dritt di Chetti mitama wäuts Chrampf ommi uf z Zahnredli kiit. Di gmüetlichere Bikerinne u Biker si i där Zyt scho gäge Wimmis zue pedalet u dert hi üs di räschtliche Biker o schommi iighout. Fritz het üs de richtig Chessu, Horbode, Oey-Diemtige a wunderbari Tour ziigt mitera wunderbari Abfahrt am Chirel entlang bis uf Oey u de ommi de Waudwägli na Wimmis zue. Vo Wimmis simmer zümli diräkt zrugg iz Gwatt zu Ringgebärgs. Dette hettes scho zum Chemi us gruuchnet u d Silvia het as prächtigs Buffet mit warme Getränk, Würscht u Chueche zwäg ghäbe. As Merci a Regula u Fritz wo no Hobuchees u Züpfa praacht hi. So sy wir gäär no i di warmi Stuba gsässe u hiis üs la guet ga. Wemmer de uusgiebig verpflegt u ommi ali ufgwärmt gsi sy, himer no de Hiimwäg under d Rödleni gno. Späteschtens dehim simmer alli froh gsi, dassmer am Morge de Chopf nid hi la heiche u üs uf z Bike gschwunge hi.